Вай^н гӏиллакх

Кхузахь-м, хьаха, не́на^н мотт а буьйцу. 
Буьйцу, хьаха, дуй къера ца хиллал-м.
Сийлахьниг а маьттаздоккхуш дуьйцуш,
Га^н а, ла^н а вайна доьгӏна хилла.

Кхузахь леларг кхи^н гӏиллакх ма деца,
Аьрха долуш хьа^н хотӏана ӏа́ма:
Дастамйоккхуш йоккху ворхӏе де́^н цӏе,
Хьа́рам йуьйцу ворхӏе а хьа^н на́на.

Цу гӏиллакхна къе́н ма буй хьа^н мотт а,
Оцу меттан охӏла хьо велахь а.
Амма сих ма ло йуьхьӏаьржахӏотта,
Иэхь-бехкана цо мел ӏаткъам бахь а.

Цул а, це́ра^н цӏокала а ва́лий, –
Хиларх и хьай^н бехкамашна хьа́рам, –
Хьайн са дассош йуьхьӏаьржонан балех,
Оьгӏазалла йаккхахьа цкъа а́ра.

Нагахь хьайна ре́за во́цург валахь,
Бага йуззий дов дӏахьеде цуьнга.
Хьа^н маттера даьлла цхьа а гӏа́лат
Туьдур долуш йац-кха цуьна^н «туьнталг».

Амма хӏума дац ахь цуьна^н къахьда,
Ахь а цӏанде са йуьхьӏаьржахӏоттарх.
Вайна цунах ӏаткъамаш хилахь а,
И до́цург а лаза ду вай^н шортта.

Къома^н дуьхьа и лазамий^н шорто
Декъалйа вай дина сийлахь ниййат
Къо́балдина, вайна йуххе хӏотта
Во́гӏучуьнца лелор ду вай гӏиллакх.